Ljósleiðaravæðingu í þéttbýli á höfuðborgarsvæðinu lokið

valur

Skrifar

12. desember 2019

skildiredsmall.jpg

Ljósleiðarinn nær nú til allra heimila í þéttbýli Kópavogs, Seltjarnarness, Garðabæjar, Hafnarfjarðar, Mosfellsbæjar og Reykjavík. Sveitarstjórar þeirra sex sveitarfélaga sem eru á höfuðborgarsvæðinu taka á móti staðfestingu þess efnis frá Gagnaveitu Reykjavíkur.

Ljósleiðari forsenda snjallvæðingar sveitarfélaga

Sveitarfélögin eru að ryðja brautina í stafrænni þjónustu við íbúa og í þátttöku þeirra í stjórn sveitarfélaganna í gegnum netið. Ljósleiðaravæðing styður einnig við atvinnulíf, eflir nýsköpun með öflugum innviðum og er grunnur að fimmtu kynslóð farsímakerfa.

Seltjarnarnes fyrst ljósleiðaravætt árið 2007

Þetta umfangsmikla innviðaverkefni á sér talsverða sögu. Seltjarnarnes var fyrsta sveitarfélagið á höfuðborgarsvæðinu sem gerði samkomulag við Gagnaveitu Reykjavíkur um ljósleiðaratengingu hvers einasta heimilis í bænum. Reykjavík kom þar á eftir og síðan hvert sveitarfélagið af öðru. Markmið þessa var í öllum tilvikum að stuðla að tengingu heimilanna við fjarskiptanet sem stæðist tímans tönn og nú njóta íbúar einhvers öflugasta sambands sem heimilum stendur til boða, Eitt gíg, eða þúsund megabita hraða í báðar áttir.

Erling Freyr Guðmundsson, framkvæmdastjóri Gagnaveitu Reykjavíkur

„Þetta er heilmikið verkefni sem nú er að baki og það hefur verið frábært að vinna það með þessu forystufólki sem öll horfa langt fram á við í uppbyggingu sveitarfélaganna. Snjallsamfélög, þar sem ótrúlega mörg verkefni daglegs lífs eru leyst með öðrum hætti en áður, eru að byggjast upp mjög ört. Snjallari lausnir eru umhverfisvænni og þess vegna er svo mikilvægt að vinna að framgangi þeirra.

Það er einstaklega ánægjulegt að hafa átt svo gott samstarf við sveitarfélögin. Nú eru í heildina fleiri en 100.000 heimili tengd Ljósleiðaranum og við hjá Gagnaveitu Reykjavíkur stefnum að því að tengja að lágmarki 20.000 heimili til viðbótar á næstu árum.“