Gagnaveita Reykjavíkur hlýtur tvenn alþjóðleg verðlaun

valur

Skrifar

26. október 2017

afhendingawardsbig.jpg

Gagnaveita Reykjavíkur hlaut tvenn verðlaun á stærstu háhraðaráðstefnu heims, Broadband World Forum, í gærkvöldi.
Önnur verðlaunin hlaut Gagnaveita Reykjavíkur (GR) fyrir besta framtak í þjónustu og þá var Erling Freyr Guðmundsson, framkvæmdastjóri GR kosinn maður ársins í háhraðageiranum.

Verkefnið „Ein heimsókn“ hjá Ljósleiðaranum hlaut þjónustuverðlaunin.
Það er samstarfsverkefni GR og þeirra fjarskiptafyrirtækja sem veita þjónustu um hann og felur í sér að í aðeins einni heimsókn til viðskiptavina er gengið frá öllum nauðsynlegum tengingum á heimilum fólks, ljósleiðarasambandið prófað og það afhent tilbúið til notkunar.

„Það er mjög uppörvandi að sjá Eina heimsókn fá þessa viðurkenningu enda eru allir sem koma að því verkefni ánægðir með þjónustuna. Viðskiptavinir fá fyrr samband, uppsetning er einfölduð fyrir tæknifulltrúa okkar og þjónustuaðilar Ljósleiðarans fá sinn búnað uppsettan á heimili viðskiptavinar.
Þetta gætum við ekki gert án faglegra vinnubragða okkar frábæra starfsfólks og samstarfsaðila,“  segir Erling Freyr, framkvæmdarstjóri Gagnaveitu Reykjavíkur.

Broadband World Forum

Broadband World Forum er vettvangur fyrir þau fyrirtæki sem koma að háhraðavæðingu fjarskipta víðs vegar um heiminn og þess má geta að um 4500 gestir sóttu ráðstefnuna heim í Berlín að þessu sinni.  Í háhraðavæðingu fjarskipta stendur Ísland mjög vel í samanburði við önnur lönd. Hátt hlutfall íslenskra heimila getur fengið eins gígabits hraða og öll heimili landsins eru tengd Internetinu með einhverjum hætti. Þá er meðalhraði fjarskiptasambanda hér á landi meiri en nokkurs staðar samkvæmt mælingu Speedtest.net.  Mikil útbreiðsla Ljósleiðarans hefur þar talsvert að segja.

Ljósleiðari fyrir allt höfuðborgarsvæðið 2018

Ljósleiðarinn nær nú þegar til 87 þúsund heimila og stendur öllum tengdum til boða eins gígabits tengihraði. Ljósleiðarinn nær til allra heimila í þéttbýli Reykjavíkur og á höfuðborgarsvæðinu öllu eru bara liðlega 4.000 heimili ótengd honum.
Tengingum þeirra heimila í þéttbýli höfuðborgarsvæðisins sem út af standa verður lokið á næsta ári.