Eitt gíg ljósleiðari kominn á hvert heimili í Kópavogi

valur

Skrifar

12. nóvember 2018

kopavogursnjallvottun.jpg

Eitt gíg ljósleiðari kominn á hvert heimili í Kópavogi
Öllum íbúum í þéttbýli Kópavogs stendur nú til boða Eitt gíg netsamband um Ljósleiðarann.
Í tilefni ljósleiðaravæðingar Kópavogs afhenti Erling Freyr Guðmundsson, framkvæmdastjóri Gagnaveitu Reykjavíkur, Ármanni Kr. Ólafssyni, bæjarstjóra Kópavogs, skjöld til vottunar á þessum áfanga í uppbyggingu innviða í bænum.
Á dögunum var lokið við tengingu síðustu heimilanna innan þéttbýlis þessa næstfjölmennasta sveitarfélags landsins.
Ljósleiðaratengingu allra heimila innan þéttbýlis alls höfuðborgarsvæðisins verður lokið fyrir áramót.

Tilbúin í framtíðina
„Ég fagna þessum tímamótum í Kópavogi. Kröfur um gott netsamband eru alltaf að aukast með aukinni tækninotkun og tækjaeign. Það er því frábært fyrir íbúa að svona góð nettenging standi öllum til boða,“ segir Ármann Kr. Ólafsson bæjarstjóri Kópavogs.

Mikill áfangi
„Það er frábært að geta veitt Kópavogi snjallvottun Ljósleiðarans eftir þessa miklu vinnu við að koma heimilum á Eitt gíg samband,“ segir Erling Freyr Guðmundsson, framkvæmdastjóri Gagnaveitu Reykjavíkur. „Við gerðum viljayfirlýsingu við bæjaryfirvöld um aukinn hraða uppbyggingar þessara nauðsynlegu innviða hvers nútíma samfélags. Það var vorið 2015 og nú, rúmum þremur árum síðar, erum við að ljúka verkinu.
Við höfum trú á því að gæðasamband heimila komi til með að styðja við nútímatækni og veita þeim aukin lífsgæði.“ segir Erling.

Öll heimili í Kópavogi komin á Eitt gíg
Fyrstu sveitarfélögin þar sem Ljósleiðarinn var lagður á hvert heimili voru Seltjarnarnes og Akranes. Lokið var við að tengja öll heimili innan þéttbýlis Reykjavíkur árið 2015. Í þessum sveitarfélögum og nokkrum öðrum, sem lokið var við fyrir nokkrum árum, hafa ekki allar tengingar verið uppfærðar í Eitt gíg og því er Kópavogur fyrsta sveitarfélagið þar sem hvert einasta tengda heimili nær 1.000 megabita á sekúndu flutningshraða í báðar áttir.

Ein heimsókn og allt tengt
Uppsetning á ljósleiðara alla leið inn á heimili er íbúum að kostnaðarlausu og síðan er greitt mánaðargjald fyrir notkun. Uppsetningarfulltrúar Ljósleiðarans tengja bæði ljósleiðarabox og allan búnað sem þarf netsamband, allt í einni heimsókn til að draga úr raski og ónæði.

Fleiri sveitarfélög á næstunni
Sú uppbygging Ljósleiðarans sem nú stendur yfir er unnin í góðri samvinnu við sveitarstjórnir viðkomandi sveitarfélaga. Fyrr á þessu ári var skrifað undir viljayfirlýsingar við þrjár sveitarstjórnir og mun tengingu heimila innan þéttbýlis í Árborg, Reykjanesbæ og í Vogum ljúka á næstu misserum. Tengivinna er sums staðar þegar hafin og í þeim öllum stendur íbúum til boða að skrá sig sem væntanlega viðskiptavini og hafa þar með áhrif á það í hvaða röð hverfi innan þeirra verða tengd.

Fjöldi þjónustuaðila
Gagnaveita Reykjavíkur, sem byggir upp og rekur Ljósleiðarann, veitir sína þjónustu í heildsölu til fjarskiptafélaga á Íslandi. Fjarskiptafélögin eru Vodafone, Nova, Hringiðan og Hringdu.